تانیتیم
ساوه لی بیر چاغداش تورک شاعیر تانیتیمی
مهندس اسدالله امیری
آد و سوی آد : حاج علی سیفی
آتاسینین آدی : صادقعلی
دوغوم ایل:1339 (گونش ایلی)
دوغوم یئری: ساوانین مرغئی کندی
ایش : صادرات بانکی کارمندی
مدنی ایشلرینین سابقهسی: 25 یاشدان شعر دئمهیه باشلاییب و ایلک شعرینی فارسجا دئییب. آمّا اوشاقلیق دؤوروندن تورک ادبیاتی، مخصوصاً تئلیم خانین شعرلری ایله تانیش اولموش. آتاسی رحمتلی صادقعلی سیفی، بیرچوخ تئلیم خانین شعرلریندن ازبرایمیش و گؤزل سسی ایله اوخورموش. یاخین اوچ مین (3000) بیت فارسجا شعر(غزل ،مثنوی، طنز, و انتقاد) و 80 قطعه تورکجه شعر (غزل و بئش-بئش) یازمیش کی هلهلیک اونون بو شعرلری توپلانمامیشدیر. رحمتلی علی کمالی تئلیم خان شعرلری اوزره چالیشان زامان، اونلا امکداشلیق ائدرکن تورک شعرینه ماراقلانیب و تورکجه شعر دئمهیه باشلاییبدیر.
آت اؤلن
گؤیول قوشو گینه پروازه گلدی
اوچوب قوندو قرا میللر دؤشونه
چمنلر سبز و بستان گوللو دمساز
قونار بولبول کیمی گوللر دؤشونه
بولوت گلیب آت اؤلهنه یاغاندا
چایلار دولوب سئللر جوشوب آخاندا
اوجهلردن اوبالارا باخاندا
قارامیل دایانیر سئللر دؤشونه
آت اؤلنین صفالیدیر باهاری
آخار سویو غم غصّه نی آپاری
یاتاقدا چوپانلار سوت داش ناهاری
آچاللار سوفرهنی گوللر دؤشونه
حسرت واریم آت اؤلنین یایینا
هاچان اولا بیرده گؤزوم آیینا
سئیره چیخم چشمهسینه چایینا
اسه باد-صبا چؤللر دؤشونه
خییال مرکبینی مینیب گزنده
قلم حیرت ائدیب هردم آزاندا
"علی" اؤلکهمیزین وصفین یازاندا
یازیلار سؤزلری ائللر دؤشونه
*****
آت اؤلن : مرغئیی یاخینلیغیندا بیر اوبانین (ییلاق) آدی دیر.
اوجه : اوجا (مرغئی لهجه سینده)
اوبالار: اوسته آدی گئدن یایلاقین اوچ اوباسی وار کی آدلاری بودور:آت اؤلن، آسگین(آسگون)، و قیزیل قاش.
قارا میل : احتمالاً بیر داغ یا دوز آدی دیر.
گونئیلی قارداشیما
بحمدالله سعادت یار اولوبدور
بو بی جان جسمه بیر دم جان گلیبدیر
گینه فصل-خزان دؤنموش بهاره
کویر-تشنه یه باران گلیبدیر
اوجالمیش چهچه-بولبول چمنده
جوشوب طبعیم غزل گویان گلیبدیر
صبا موژده آپار خان ائللریمه
یارالی دردینه درمان گلیبدیر
مرغئی کندینه دوردانه مهمان
گونئیلی مرد-نکته دان گلیبدیر
سیلئیدیم یوللاری موژگانیم ایله
بیلئیدیم گر کی یار اوردان گلیبدیر
بیلئیدیم کاش او یولدا جان قویایدیم
ائدیدیم جانیمی قوربان گلیبدیر
یقیناً شهریار-مولک-سؤزدن
تئلیم خانه قاصید یاردان گلیبدیر
سعادت یار اولوب اقبال، همراه
گونئیلی سیزلره مهمان گلیبدیر
قرا بختیم یاتیب غفلت ده قالدی
اورک یاندی جیگردن قان گلیبدیر
سیزی گؤرمک منه قیسمت دئییلمیش
گؤزوم یاشی ائدیب طغیان گلیبدیر
یوخوم بیر ذرّه قصد-چاپلوسی
بو سؤز بیر نیک پنداردان گلیبدیر
خدا بیلسین اورکدندی بو سؤزلر
دئمه بو سؤزلریی هاردان گلیبدیر
"علی" آدیم دی شهرت" سیفی" یم من
تئلیم خانی سئونلر طیفییم من
ولی طنزده تخلص مفلسم من
گونئیلی جان سنه چوخ مخلصم من
*****
بو شعر تئلیم خان قورولتاییندا (30/4/85) ایشتیراک ائدن دوکتور گونئیلی بهیه ایتحاف اولوب.
مرغئی: شاعیرین و هابئله تئلیم خانین دوغما یوردو اولموش ، ساوانین بیر کندینین آدی.
دونیا
عجب دونیادی بو دونیای-فانی
گؤگرتمز توپراغی تخم-وفانی
یئتیرمز کیمسهنی آخر وصاله
توجه ائیله بو اندک مجاله
قبول ائیله بو پندی ائیلمه لج
بو دیوارین بناسین قویما سن کج
او دیوارین کی آدی زندگی دیر
کج اولسا حاصیلی شرمندگیدیر
عزیزیم راضی اول خیرالاموره
دولو شیرین نه چللنمیش نه غوره
ائله بیچارهلردن دستگیری
غرور-وجه نین اولما اسیری
اینانما چون جوانسن چوخدو وقتین
قبول ائیله کی اصلاً یوخدو وقتین
جاوانلیقدا او کس کی غافیل اولدو
اروج ایله نمازه کاهیل اولدو
گؤرر بیر گون کی وقتی قورتاریبدیر
اؤزو داشیله اؤز باشین یاریبدیر
"علی"نین بختی یاتدی غافیل اولدو
گئچیب بیهوده عؤمرو باطیل اولدو
*****